Elə istəyirəm ki... - Günün şeiri

19 Martt 2024 10:01 466

Novruz sayıqlamaları

Elvin Bakiroğlu

Bu bayram keçdi sənsiz,

Keçdi bu bayram belə.

Novruz bahar gətirdi,

Gül açdı yaram belə.

Axışdı kəpənəklər

Yaza müştəri kimi.

Göyərdi səmənilər

Yaramın yeri kimi.

Səndən xəbər də yoxdu,

Gətirməyib qaranquş.

Sənsiz qaranquşun da

Yazdan xəbəri yoxmuş.

Bir tonqal qalamısan

İçimdə, gəl görəsən.

Bəlkə özün tullanıb

Xeyir-dua verəsən.

Qalmışam bir kosayla

Bir keçəlin əlində.

İki can arasında,

Bir əcəlin əlində.

Süfrəmdə yeddi nemət

Çatışmır səkkizinci.

Sevincimin ürəyi,

Ürəyimin sevinci.

Gözlərinin qarasın

Axtarıram aşımda.

Rəngli yumurtaları

Qırıram öz başımda.

Ümid varsa, qapıya

Papaq atmaq çox asan.

Elə istəyirəm ki,

Papaqdan sən çıxasan…

Xəbər

“Rəng mühəndisi”ndən Dostoyevskiyə - Pərvanə Əliqızı yazır
“Mühasirə” epopeyası haqqında - Seymur Baycan yazır...
Sənətkar və repressiya mühiti - Muxtar Kazımoğlu yazır...
Aqil Abbasın qorxusundan yazdığım yazı
“Rəng Mühəndisi” romanında istehza və dekonstruksiyası - Norveçdə çıxan məqalə
Əkrəmvari - Vüqar Van yazır...
Ədəbiyyatın gizli coğrafiyası: “La Qarp - 75”
Orxan Həsəninin yeni hekayəsi: Ekskursiya
Əli Kərim şeiri - Cavanşir Yusifli yazır...
Vüqar Əmrahın hekayəsi: La qarp -75